Nybygget vil erstatte det såkalla "Bataldenhuset", i ytre del av Strandgata. Fasaden mot gata er utforma likt med eksisterande bygg, for å bevare bygningsmiljøet i sentrum. Teikningane er laga av Kinn Arkitekter AS i Florø.

Åtte leilegheiter
Det nye bygget får åtte leilegheiter fordelt på tre plan. Både i andre og tredje etasje blir det to tre-roms leilegheiter og ei to-roms leilegheit. Kvar av leilegheitene blir på 68 kvadratmeter. Toppetasjen får to fire-roms leilegheiter, kvar på 92-93 kvadratmeter.
Prisane ligg på 1,89 - 2,19 milll. kroner for to-roms husværa, 1,99 - 2,36 mill. kr for tre-roms husværa og 2,99 mill. kroner for fire-roms husværa.

Alle husværa får stove og kjøkken som er vendt ut mot Strandgata. Mot sør er det gode flislagde terrassar.

Leilegheitene har kvalitetar som vassboren golvvarme frå felles varmepumpe-anlegg, heis, balansert ventilasjon, parkett på golva og flislagde bad.

Svært sentralt
Leilegheitene får tilkomst frå både Strandgata og frå Markegata. Innkøyringa skal skje frå Strandgata, men dei overbygde parkeringsplassane ligg på oppsida av bygget. Vidare blir det gangtilkomst frå Markegata. Alle leilegheitene har ein sportsbod i underetasjen eller i eit frittståande bygg mot Markegata.
Frå Strandgata er det kort veg til alle sentrumsfunksjonar i Florø. Frå nybygget er det berre 100 meter til Kyrkjeparken og derifrå er det direkte tilkomst til turområdet ved Litleåsen og Storeåsen.

På grunnplanen er det teikna inn næringsareal som dekkjer halve etasjen. Her kan det kome forretning eller eit kontor. Resten av arealet skal nyttast til gjennomkøyring, teknisk rom, heis og bodar.

Sjølveigar-leilegheiter
Det er Boligbyggelaget BOiVEST som står som seljar av husværa. Salet skjer gjennom Garanti Eiendomsmegling Vest AS, og leilegheitene blir selde som sjølveigar-leilegheiter. Strandgata 22 vil derfor bli organisert som eit seksjonert sameige når alle leilegheitene er selde.
Medlemmer av BOiVEST har forkjøpsrett til bustadene, innan ein oppsett frist 28. februar 2011. Men ikkje-medlemmer kan også søkje på dei utlyste leilegheitene og vil då bli prioriterte etter dato for mottak av søknadsskjema.